Sarrera:

Goiko ekoendoskopia digestiboa azterketa bat da, ahotik hodi malgu bat sartuz hestegorria, urdaila eta duodenoa barrutik zuzenean eta horien paretak eta inguruko egiturak (mediastinoa, pankrea aldea eta behazun-bidea) ekografia bidez ikusteko aukera ematen duena. Ekoendoskopioa, bere muturrean ekografia-sistema bat daraman endoskopia-hodi bat da, eta berari esker barrualdea normal ikusteko eta ingurunea ekografia bidez ikusteko aukera ematen digu.

Zertarako egiten den:

Aurreko paragrafoan aipatu diren organoetako tumore onaire eta gaiztoen estadiaje lokala egiteko. Horretarako, tumorearen sakontasuna, alboko organoetara iritsi den ala ez, eta tumorearen inguruko gongoilei erasan dien ala ez aztertzen du.

Lehendik tratatutako tumore berritu posibleak garaiz detektatzeko egiten da.

Endoskopia eta ekografia bidez gidatutako ziztada egiten da, horrela lesioetako lagina atera eta mikroskopioan analizatu ahal izateko.

Prestaketa:

Prestaketa gastroskopiarako egiten denaren berdina da. Gutxienez 6 bat ordu baraurik egon behar da, urik ere hartu gabe. Botikaren bat hartu behar baldin baduzu, ahalik eta ur gutxien hartuz egin beharko duzu, eta proba egin behar dizun espezialistari esan. Odolaren koagulazioan alterazioren bat baduzu, edo koagulazioa alteratzen duen botikaren bat hartzen baduzu, horren jakinaren gainean jarri behar duzu proba egin aurretik, batez ere lagina lortzeko ziztada egin behar zaizunean.

Teknika:

Miaketa egiteko, anestesista batek lo harraraziko dizu eta zu ez zara ezertaz ohartuko. Lo harrarazi aurretik, plastikozko pita bat jarriko dizute, zure hortz-haginak babesteko. Aztertu nahi den digestio-bideko partea arakatzeko, aparatua ahotik sartuz egiten da miaketa, eta behar izanez gero sartzen da material lagungarria ere ekoendoskopioaren beraren bitartez. Miaketa hauen denbora izan daiteke luzeagoa edo laburragoa zer aztertu nahi den kontu, baina normalean gutxienez 10-15 minutu eta gehienez 2 ordu irauten dute.

Esnatzea:

Familiarteko edo lagunen batekin etortzea komeni da. Miaketa egin ondoren, hau anestesiarekin egin baldin bada, denbora pixka bat itxaron beharko duzu ondo esnatu arte, hau da, anestesistak alta eman eta endoskopiako unitatetik ateratzen zaren arte. Gero, minutu batzuk itxaron beharko duzu likido edo janaririk irentsi gabe, gerta liteke-eta eztarrian trabatzea edo gorakoak izatea, erabilitako anestesien ondorioz. Hurrengo 24 orduetan ez duzu gidatu behar eta ezta kontzentrazioa eskatzen duen jarduerarik egin ere. Miaketaren ondoren, litekeena da ondoez iragankorren bat edo beste sentitzea, esate baterako, eztarriko mina eta sabeleko mina —gasak pilatzeagatik—, etab. Normalean ekoendoskopia gehienak modu anbulatorioan egiten dira.

Arriskuak:

Arriskurik usuena eztarriko mina eta sabeleko mina izaten dira, arinak eta iragankorrak. Badaude beste arrisku larriago batzuk, baina oso gutxitan gertatzen direnak, adibidez, odoljarioa eta hestea zulatzea. Horiek baino larriagoak, adibidez bihotz-arnasak geratzea eta horrelakoak, oso noizik eta behin gertatzen dira, eta paziente adinekoetan, oso larrietan edo egoera kritikoan daudenetan. Nolanahi dela, pazienteak proba egiteko baimena eman beharko du beti, baimen informatu bat sinatuz.